Типикон

По 6–й песни, кондак и икос храма. На 9–й песни, поем Честнейшую: Светилен воскресен. Слава, храма: И ныне, праздника. На хвалитех стихиры воскресны, 4: и храма, с припевы, 4: Слава, храма: И ныне: Преблагословенна еси: Славословие великое: ектении и отпуст: и исхождение в притвор. Слава, и ныне, стихира евангельская, и совершенный отпуст. На Литургии блаженны гласа на 4: и праздника песнь рядовая, на 4: и храма песнь 6–я на 4. и прочая служба богооnцев и храма.

[Смотри] Тогоже дне, Поем на вечерни отдание храму, якоже предписася в 1–й главе,

Аще случится храм преподобныя мелании, кроме недели декемвриа в 31 день. И поем храма ея подобне, якоже указася сего месяца в 27 день.

Глава 19. Аще ли храм преподобныя мелании случится в неделю со отданием праздника. И поем храма ея службу, якоже указася введению Богородицы отдание в неделю, со святым климентом, по той же главе яко писася в ряду в месяцеслове. святых же богоотцев поем службу прежде сего дне, когда хощет настоятель.

Глава 20. Аще случится ианнуариа в 1 день храм святаго василиа кесарийскаго: Или храм коего святаго, или святыя случится в неделю пред богоявлением, или во отдание богоявления: И поем в неделю, службу храма, пред богоявлением, якоже симеона столпника храму в неделю: а на отдание богоявления, поем службу храма, якоже бденнаго святаго в неделю, в немже предваряют вся праздника.

Глава 21. Аще ли храм собора Иоанна предтечи в неделю: И поем службу храма, якоже симеона столпника храму указася в неделю, точию зде поем на хвалитех стихиры воскресны 3: и храма, 2: и праздника, 3, с припевы их: Слава, храма: И ныне: Преблагословенна еси: Славословие великое, и прочее поем воскресно, и храма, и до отпуста. Такожде и На Литургии служба поется воскресна, и храма.

Глава 22. Аще случится храм святаго, или святыя в попразднстве в кий день, кроме недели. И поем всю службу, вечер, и утро, якоже бденнаго святаго в неделю. На Велицей Вечерни, на Господи воззвах, стихиры праздника, 3: и храма, 5. Аще храму двои стихиры, и поем праздника, 3: и храма, 6: и прочее все праздника, и храма.

Глава 23. Аще ли храм святаго, или святыя в попразднстве в неделю. И поем службу храма, якоже великаго святаго прилучится в неделю, а попразднства службу оставляем. На Утрени полиелей и седальны храма, евангелие храма, и прочее. Катавасиа праздника. Стихира евангельская. На 1–м часе, и На Литургии служба воскресна и храма.

Глава 24. Аще ли храм святаго, или святыя, случится с предпразднством, или со отданием коего святаго в неделю. И поем службу храма, вечер, и утро, якоже указася храму симеона столпника в неделю. Точию зде поем на хвалитех стихиры воскресны, 3: и храма 2: и праздника 3, со Слава. Припевы же глаголем праздника. Таже самогласну стихиру праздника поем с припевы его. Слава, храма. И ныне: Преблагословенна еси: и прочая служба, на Утрени, и На Литургии.

На вечерни же отдание храма, якоже предписася в первой главе.

Глава 25. О храмех святых случающихся быти от недели мытаря и фарисеа, до недели всех святых.

Аще случится храм святаго, или святыя, в неделю мытаря и фарисеа, или блуднаго, или мясопустную, или сыропустную. На Велицей Вечерни, Блажен муж: кафисма вся. На Господи воззвах, стихиры воскресны, 3: и триоди три: и храма 4. [Аще ли неделя мясопустная. Стихиры воскресны 3, и триоди 4: и храма 3:] Слава, триоди: И ныне, богородичен 1–й, гласа. Вход. Прокимен дне, и чтение храма. На литии стихиры храма, и триоди: зри всего последования службы сретения господня, егда случится в сия недели.

Глава 26. Аще случится храм святаго, или святыя, в субботу мясопустную: И поем всю службу, якоже сретению господню.

Глава 27. Аще случится храм святаго, или святыя, в понедельник, или во вторник, или в четверток сырныя недели. И поем службу храма, на малей, и Велицей Вечерни, и на Утрени, все храма святаго непременно, якоже указася в ряду: триодь бо с храмом не поется, якоже и сретению, в кий день ни прилучится на сырной недели, кроме субботы и недели, разве самогласна дне.

Глава 28. Аще случится храм святаго в среду или пяток сырныя недели. На малей, и Велицей Вечерни, и на Утрени, и На Литургии, совершается служба вся, якоже указася в понедельник сырный непременно. Бывают же на конец вечерни, и утрени, и коегождо часа, по 3 поклоны великия. На часех глаголем тропарь и кондак храма. На 6–м же часе глаголется тропарь паремии: и чтется паремиа. Литургиа же златоустаго совершается во свое время. Вечерню поем по дневному во свое время. На Господи воззвах, стихиры храма, 3: и святаго рядоваго, 3. Слава, храма: И ныне, богородичен. Прокимен дне, и паремиа. На стиховне триоди самогласен дне, дважды, и мученичен: Слава, храма: И ныне, богородичен. Тропарь храма: Слава, и ныне, богородичен: и отпуст.